Iha regra ne'e, governu deside hodi suspende atividade hotu-hotu ne'ebé halibur ema barak, hahú husi movimentu transporte públiku, atividade desportiva, festa, atividade kultura, no regra ba númeru ema ne'ebé asiste mate uma barak liu mak ema na'in 10.
Ba movimentu ema husi rai li'ur tama iha Timor-Leste, iha regra ne'e deside hodi bandu ema estranjeiru hotu-hotu ne'ebé atu tama Timor-Leste, kontinua loke odamatan ba sidadaun Timor-Leste ne'ebé hakarak fila, maibé tenke tama kuarentena.
Ba sira ne'ebé mai husi rai li'ur no iha sintomas Covid-19, obrigatoriamente tenke tama fatin izolamentu.
Regra ne'e mós proibi reuniaun no manifestasaun ne'ebé halo husi ema liu na'in lima, no mós suspende atividade relijiozu hotu-hotu.
Ba atividade komersial, iha regra ne'e obriga ema hotu-hotu ne'ebé vizita fatin komersial atu tenke uza maskara taka ibun no inus, tenke fase liman molok tama loza, minimerkadu, supermekadu, no merkadu, no mantein distansia metru ida.
Regra ne'e mós obriga atu fatin komersiu sira tenke prepara fasilidade fase liman, no na'in ba fatin komersiu labele husik ema ne'ebé la uza maskara no la fase liman atu tama hodi sosa sasan.
Tuir mai tempotimor.com halo rezumu ba medidas ka regras ba estadu emerjensia ne'ebé Konsellu Ministru deside iha Sabadu (28/03).
Medidas hirak ne’ebé Governu aprova iha Konsellu Ministru mak hanesan tuir mai ne’e:
Suspensaun:
Suspende Movimentu Transporte Publiku
Suspende Atividade Desportiva Sira Hotu
Suspende Atividade Halibur Malu iha Grupu
Suspende Atividade Festa
Suspende Atividade Kultural ne’ebe Halibur Ema Barak
Suspende Vizita Mate Uma Simultanea iha Numeru Bot, Masimu na’in 10
Suspende Estranjeiru atu Tama Mai Teritoriu Timor-Leste
Sidadaun Timoroan Ne’ebe Tama Mai Teritoriu Tenke Tama Kuarantena
Individu Ne’ebe Dezenvolve Sintomas Covid-19 Tenke Hetan Teste Husi Ministeriu Saude
Izolamentu Obrigatoriu ba Ema Ne’ebe Afetadu husi Covid-19
Izolamentu Obrigatoriu ba Individu Ne’ebe Tama Teritoriu Timor-Leste no Hetan Sintomas Covid-19
Proibi Halo Reuniaun no Manifestasaun Ne’ebe Liu Ema Na’in 5
Suspende Ativiade Relijozu Hanesan Missa, Sholat, etc
Atividade Komersial:
Ba Individu ne’ebe vizita fatin Komersial tenke Uza Maskara Taka Ibun no Inus
Fase Liman Antes Tama ba Fatin Komersiu hanesan Loja, Mini Merkadu, Supermerkadu, no Merkadu
Mantein Distansia Minimu Metru Ida Iha Fatin Komersiu Sira Mensiona iha Leten
Na’in ba Fatin Komersiu Tenke Prepara Fasilidade Fase Liman Nian
Na’in ba Fatin Komersiu Labele Husik Ema Ne’ebe La-Kumpre Regra Fase Liman no La tau Maskara atu Tama iha Fatin Komersiu
Vendedor Ambulante ka Gerobak Bele La’o Nafatin Maibe Tenke Kumpre Tau Maskara no Prepara Fasilidade Fase Liman Nian