Deputadu husi Bankada CNRT Patrocino Fernandes dos Reis husu ba Ministra Saúde interina Elia dos Reis Amaral atu tenke divulga informasaun ne'ebé loos ba públiku.

Deputadu CNRT foti kestaun ne'e relasiona ho informasaun ne'ebé Ministra Elia hato'o ba Primeiru Ministru Taur Matan Ruak kona-ba suspeitu Covid-19 iha Same ne'ebé hetan reasaun kontra husi Diretora Serbisu Saúde Munisipiu Manufahi.

Tuir deputadu ne'e, informasaun kona-ba suspeitu Covid-19 iha Same halo komunidade iha Munisipiu Manufahi paniku.

Nia mós lamenta ho asaun Diretora Serbisu Saúde Munisipiu Manufahi ne'ebé rezeita direitamente deklarasaun PM Taur.

Tuir nia, fonte informasaun ne'e konserteza tenke mai husi serbisu saúde hafoin intrega ba Ministeiru Saúde no kanaliza ba Primeiru Ministru atu relata no divulga ba públiku.

"Favor ida tau atensaun ba funsionariu sira hanesan ne'e par depois hatun uitoan risku kona-ba populasaun nia paniku nune'e mós par konfiansa povu nian ba orgaun estadu sira metin nafatin par serbisu lai ba oin," dehan Patricino durante diskusaun ba estadu emerjensia iha Parlamentu Nasionál, Kinta (26/03).

Entretantu, PM Taur hatete, Timor-oan balun karantina hela iha munisipiu Manufahi, hafoin loron 14 no rezultadu teste hatudu katak la pozitivu Covid-19 sira bele fila fali ba uma.

"Husi Same hatete katak sira sei karantina de'it," dehan PM Taur ba deputadu sira.