Diretora Servisu Saúde Munisípiu Manufahi Florençia Tilman Corte-Real rezeita informasaun ne'ebé Ministra Saúde interina Elia dos Reis Amaral hato'o ba PM Taur Matan Ruak katak iha Same ema na'in ida sai suspeitu ba Covid-19.
Lee mós: PM Taur: Ema Ida iha Same sai Suspeitu ba Covid-19
"Ha'u atu hateten kona-ba informadaun ne'ebé mak sua eselénsia ohin fó sai iha Parlamentu Nasionál (PN) ne'e, atu hatete katak, ami laiha ema ne'ebé suspeita ba Corona Virus, ha'u lahatene maibé atu hatete de'it katak ami laiha suspeita kona-ba Covid-19," dehan Diretora ne'e via telefone.
Tuir nia, iha duni Timor-oan na'in tolu ne'ebé foin fila husi rai li'ur no tama iha fatin izolamentu no foin halo obsevasaun durante loron tolu (3).
"Maibé seidauk deteta hanesan suspeitu ba Corona Virus, tanba ne'e Serbisu Saúde Munisipiu Manufahi rezeita totalmente informasaun ne'e," deklara Florençia.
Molok ne'e, Primeiru Ministru Taur Matan Ruak informa Timor-oan ida iha Same, Munisipiu Manufahi mak sai suspeitu ba Corona Virus Deasses 2019 (Covid-19).
PM Taur informa asuntu ne'e iha Parlamentu Nasionál bainhira aprezenta iha sesaun plenaria ba diskusaun Estadu Emerjensia.
Tuir PM Taur, Timor-oan ne'e foin fila husi rai li'ur.
"Ministra Saúde foin aviza katak ita daudauk ne'e iha suspeitu ida iha Same, foin mai husi sorin balun," dehan PM Taur iha PN, Kinta (26/03).
PM Taur dehan, klaru katak ba kazu Covid-19 importadu governu esforsu atu izola hodi labele da'et tan ba ema seluk.
"Tanba se afeta, sei multiplika, lais no maka'as loos," dehan Taur.