Akontesimentu ne'e hamosu persepsaun oioin. Balun deskonfia partidu polítiku sira iha Parlamentu Nasionál maka halo, tanba la konkorda atu altera lei ne'e hodi fó kompeténsia ba governu, atu ezekuta osan hodi responde ba situasaun emerjénsia hanesan Coronavirus Disease 2019 (Covid-19) no inundasaun. 

Deskonfiansa ne'e mosu tanba antes ne'e, deputadu sira husi bankada balun la aseita ho alterasaun ne'e. Nune'e, iha momentu ahi mate só akontese de'it iha sala plenária, maibé divizaun sira seluk kontinua lakan nafatin. 

Nune'e, liu loron ida, iha Tersa (24/3), partidu koligasaun foun kompostu husi Partidu CNRT, PD, KHUNTO, UDT, FM no PUDD, halo kedas reuniaun alargada iha sede CNRT nian. 

Iha enkontru ne'e, fó imprensaun makaas liu atu deputadu koligasaun sira tenke obediese tuir orientasaun partidu koligasaun nian, bainhira la halo tuir maka sei recall (hasai) husi PN tuir Lei Partidu Politíku. 

Entretantu, Prezidente Bankada FRETILIN, Aniceto Longuinhos Guterres hateten, ahi mate deperrente ne'e tenke iha investigasaun. 

"Kazu ida ahi mate derrepente ne'e tenke esplika, see nune'e duni tenke investiga, tanba ne'e krime. Para ema labele abitua hodi halo nia atitude ne'e. See mosu akuzasaun ruma dehan se CNRT mak halo ka FRETILIN mak halo, nia halo duni krime," tenik nia, iha Uma Fukun PN, Kuarta (25/3). 

Iha fatin hanesan, Deputadu Bankada PLP, Francisco Vasconcelhos, dehan ahi mate derepente ne'e iha sapotajen ida. 

"Bainhira ahi mate, liu minutu balun ha'u buka kedas lojístika sira hodi husu kedas tanba saida mak ahi mate iha plenária? Maibé iha diresaun seluk ne'e lakan hotu. Entaun ha'u mós dehan katak ne'e sapotajen ida," tenik nia. 

Deputadu Bankada FRETILIN, David Ximenes 'Mandati', sente ne'e estrañu uitoan tanba halao ona knaar durante tinan barak iha PN, maibé foin akontese primeira-vés ami mate bainhira atu halo votasaun. 

"Atu vota ne'e mak ahi mate, primeira-vés ahi ne'e mate, ha'u mós iha ne'e kleur ona. Sá halimar mak hanesan ne'e? Ne'ebé ha'u mós dehan ba ha'u-nia maluk Deputadu Hugo katak, sá halimar mak ida ne'e," tenik Mandati. 

Nune'e, Prezidente Bankada CNRT, Duarte Nunes mós husu Prezidente PN atu hasai despaxu para halo investigasaun, tanba ema akuza katak CNRT mak halo. 

"Ema akuza dehan ne'e CNRT mak halo. Ita halo boikita hodi hamate eletrisidade. Entaun atu hakotu problema ida nee forma ekipa ida para halo investigasaun, ita sira ne'e sé mak halo no tanba saida mak ahi mate? dehan Duarte. 

Entretantu, Prezidente PN, Arão Noe de Jesus Amaral, promete sei hasai despaxu ida hodi halo investigasaun ba atitude ema balun ne'ebé hatudu inresponsabilidade hodi hamate ahi, iha Segunda (23/03), ne'ebé halo PN kansela plenária bainhira atu hakat ba faze votasaun.

"Kualker sé de'it, ne'ebé husi investigasaun ne'e mak hetan kala to'o mai ha'u mós, ha'u prontu atu responsabliza," tenik nia. (*)