Porta-vós aliansa koligasaun foun, Antonino Conceicao 'Kalohan' hateten, koligasaun solidu hela no prezidente partidu sira ida-idak nafatin sei komprometidu iha koligasaun laran.
"Deputadu bankada ida-idak nian agora koordena malu ho armonia iha debate hotu ne'ebe la'o iha Parlamentu Nasionál", relata Kalohan liuhusi konferensia imprensa, iha Sede CNRT, Bairru-dus-Grillos, Tersa (24/3).
Koligasaun nafatin hein Prezidente Republika nia desizaun no koligasaun fiar Xefe Estadu sei halo knaar tuir artigu 74 Konstituisaun RDTL hodi garante unidade no instituisaun demokrasia sira-nia funsionamentu regulár.
Koligasaun mós afirma, atu koligasaun ne'e halo atu responde ba situasaun polítika no krize mundiál ne'ebe oras ne'e Timor-Leste hasoru.
Tanba ne'e koligasaun haree no fiar katak atu responde ba situasaun ne'e presiza tebes lideransa forte ida, nune'e lori pais ida ne'e sai hosi situasaun susar ne'e. (*)
