Print this page

Governu Dehan sei Garante Médiku no Jornalista Kombate Covid-19

Sekretariu Estadu Komunikasaun Social, Mericio Juvinal dos Reis 'Akara' ho eis Prezidente TLPU partisipa iha debate ida kona ba liberdade Imprensa Sekretariu Estadu Komunikasaun Social, Mericio Juvinal dos Reis 'Akara' ho eis Prezidente TLPU partisipa iha debate ida kona ba liberdade Imprensa Foto File

Tempotimor (Dili) - Governu sei tau atensaun hodi fó apoiu no garante médiku no jornalista sira, tanba konsidera grupu sira ne'e hanesan hamriik iha oin luta kombate Coronavirus Disease (Covid-19) iha Timor-Leste.


Sekretáriu Estadu Komunikasaun Sosiál (SEKomS), Mericio Juvinal dos Reis 'Akara' hateten, médiku no média sira mak hanesan grupu ne'ebe iha oin atu kombate Covid-19.

"Ha'u dehan tiha ona ba ekipa konjunta para asegura ka fó asesu ba média sira hodi halo kobertura atu halo notísia kona-ba progresu liga ba Covid-19", dehan nia, iha Parlamentu Nasionál, Segunda ( 23/3).

Sekretáriu Estadu informa ona ba Ministériu Saúde (MS) para fó tempu ba média sira atu kobertura ba situasaun agora no iha enkontru ekipa konjuntura mós ko'alia beibeik ona ba asuntu ne'e.

"SEKomS fó hatene ona ba ekipa konjunta atu média hotu partisipa hodi fó sai informasaun ba públiku", tenik Akara.

Sekretáriu Estadu ne'e esplika, iha situasaun agora papél média no médiku nian importante tebes, tanba sira mak iha oin atu kombate Covid-19.

"SEKomS fo hatene ona ba ekipa konjunta labele tenta atu la fó asesu ba média, tanba ita hakarak fó sai informasaun ne'ebé loloos, see lae mak akontese daudaun agora ema fiar fali status pesoál nian. Nune'e ekipa konjunta ne'ebe la fó ita boot sira asesu, informa para ita bele husu tuir sé mak la fó asesu", tenik nia.

Akara akresenta, SEKomS sei fó garantia ba média atu hetan informasaun loloos husi Ministériu Saúde (MS) no Organizasaun Mundiál Saúde (OMS). Tanba ne'e, husu ba jornalista sira kuandu iha preokupasaun ruma labele nonook hato'o kedas.

Entertantu, governu liuhusi ekipa konjunta sei apoiu jornalista sira ho maskra, luvas no buat seluk ne'ebé presiza, maibé mínimu posibilidade kada instituisaun média sira tenke asegura uluk ninia jornalista sira.

"Preokupasaun sira ne'e horseik tama ona iha ajenda diskusaun no ohin sei hato'o iha Konsellu Ministru (KM) para oinsá atu proteje mós média sira, atu hala'o servisu avontade, tanba sira mak hamrik iha oin, governu presiza proteje sira duni", dehan Akara.

Rate this item
(0 votes)
Last modified on Monday, 23 March 2020 19:32
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items