Ministru Obras Públika, Salvador Pires hateten, kustu estimativa ba rekupera área afetadu hamutuk tokon US$ 15.
"Kustu estimativa ne'ebé ekipa Task Force ne'e aprezenta tokon $15, karik sei amenta ka menus oituan tanba lista membru balun sei amenta tan," dehan nia, iha Palásiu Governu, Kuarta (18/3).
Membru Governu ne'e akresenta liután, área sira ne'ebé sai prioridade atu rekupera ka normaliza mak mota tolu hanesan Hera, My Friends no Bekusi, inklui Eskola 05 de Maiu Bekora.
MOP mós sei estuda lei tolu hanesan Urbanizasaun no Edifikasaun, Instrumentu Planeamentu Territoriál no Kualifikasaun Klasifikasaun Uzu Solu, aprezenta ona ba Konsellu Ministru para serkula, hafoin hetan feedback no sei koordena ho MRLAP, nune'e kuandu la xoke ho lei seluk sei avansa hikas ba Konsellu Ministru atu aprova.
Ekipa Task Force soru-mutu ho Primeiru Ministru aprezenta mós tore eletrisidade, transformadór ne'ebé besik mota ninin no afeta husi inundasaun no kanalizasaun bee.
Konsellu Ministru rasik deside ona, sei fahe projetu nia montante tokon $5 Konsellu Ministru mak deside. Tanba tokon $1 to'o tokon $5 CAFI mak deside no menus husi tokon $1 liña ministeriál mak deside.
Entertantu, ekipa Task Force ne'ebé harii husi orientasaun Primeiru Ministru kompostu husi MOP hanesan Diresaun Jeral Obras Públika, Eletrisidade Agua no Saneamentu, husi MPIE mak hanesan ADN, CNA no Grande Projetu. (*)