PM Taur deklara kestaun ne'e bainhira partisipa iha Konferensia partidu FRETILIN ba dala haat iha salaun Parokia São José, Katedral, Dili, Sabadu (14/03).
Xefe Governu ne'e dehan, iha Timor Leste governasaun ida labele sees husi maioria, tanba impase iha TL mosu tanba laiha partidu ida ne'ebé konsege iha poder.
"Tanba ne'e mak obriga ita halo justu. Iha pais sira ne'ebé iha idiologia destinji vizaun ne'e fasil, iha eskerda direita ne'e aranja politika di'ak, ita-nia ida ne'e laiha ou karik ida ne'e iha mós ha'u la hatene, mais iha ita nian mais buka oportunidade par ukun de'it, fahe kadeira, fahe programa i restu ba tasi," dehan Taur.
Tanba ne'e, nia dehan, partidu barak maibé partidu ida de'it la konsege atu influensia mesmesak.
"Partidu sira barbarak la pengaruh mesak, tanba nia iha tiha baze ida forte, liu-liu ami partidu sira foun ne'e, ita-boot sira, FRETELIN, istoriku, di'ak no at iha filozofia no kultura uma lideransa par sorvevive, enkuantu partidu seluk tenta buka ninia espasu, no ninia di'ak iha diversidade iha ita-nia nasaun."
Taur dehan tan, iha diskusaun barak iha mundu kona-ba maioria ne'e par atu kontrolu, maibé depende mós ba lideransa.
"Kuandu lider di'ak foti desizaun ne'ebé di'ak barak liu duke at, no lider at foti desizaun ba at barak liu duke di'ak," dehan nia.