"Ministru Obras Públika aprezenta projetu dekretu lei ne'ebé kria Empreza Públiku Eletrisidade Timor-Leste, E.P (EDTL E.P) no aprova nia estatutu rasik", dehan Ministru Prezidénsia Konsellu Ministru, Hermenegildo Augusto Pereira Cabral, iha Palásiu Governu,(11/3).
Governante ne'e esplika, EDTL E.P nia funsaun prinsipál mak hasa'e kualidade husi servisu ne'ebé prestasaun banhira fornese enerjia eletríka liuhusi Empreza Públiku ida ne'ebé espesializadu iha setór eletrisidade.
Nia hatutan, sei halo planu di'ak liután no jere ho lalais setór hotu hodi hadi'a no substitui infraestruru ne'ebé eziste hela. Haluan fornesimentu no aplika prátika di'ak ba operasaun komersiál ho objetivu atu hetan liután reseita ho aplika prátika prinsípiu ba utilizadór pagadór.
"Hadi'a liután komunikasaun ho konsumidór sira sensibiliza atu hadi'a no utiliza didi'ak servisu ne'e, estabelese fiskalizasaun ida efetivu ba koneksaun ilegál sira no konekta ho sistema kontajen automátiku ka prepagu ba konsumidór hotu", tenik nia. (*)
