Ministru Prezidénsia Konsellu Ministru, Hermenegildo Agusto Pereira Cabral hateten, iha rezolusaun ne'e atu haree ba sidadaun estranjeiru ne'ebé iha semana haat ikus ne'e sai ka halo tránzitu liuhusi Repúblika Populár Xina, Repúblika Koreia, Repúblika Italiana no Repúblika Izlámika Iraun. 

Projetu rezolusaun ne'e aprezenta husi Ministru Negósiu Estranjeiru Koperasaun (MNEK) Dionísio Babo Soares no hetan ona aprovasaun husi Konsellu Ministru (KM).

 "Rezolusaun ne'e atu fo kontinuasaun de'it ba rezolusaun ne'ebe uluk aprova ona hodi kontrola perigu ka situasaun ne'ebe relasaun ho Corona Virus nian", dehan nia, iha Palásiu Governu, Kuarta (11/3). 

Governante ne'e, konsidera propagasaun ba Corona Virus Diseases 2019 (Covid-19) la'o lalais tebes. Nune'e, medida kona-ba interdisaun ne'ebe define iha termu rezolusaun ne'e sei reapresia fali kuinzalmente hodi haree ninia manutensaun ka eliminasaun. 

Liuhusi rezolusaun ne'e fó ona orden ba Ministériu Saúde (MS) atu fo fila-fali orientasaun servisu no koordena ho liña ministeriál relevante sira, atu haktuir ba protokolu ne'ebe estabelese ona husi Organizasaun Mundiál Saúde (OMS). (*)