Ministra Saúde ezersísiu (MS), Elia António de Araújo dos Reis Amaral, aprezenta ona projetu dekretu lei ida no hetan ona aprovasaun husi Konsellu Ministru para garante ba kuidadu urjénsia ne'ebe di'ak liu ka emerjénsia médika ba territóriu nasionál tomak.

"Sei iha servisu nasionál ketak ida ba servisu ambulánsia sira-nian", dehan Ministru Reforma Lejizlativu Asuntu Parlamentár (MRLAP), Fidelis Manuel Leite Magalhães, iha Palásiu Governu, Kuarta (4/3).

Ministru Fidelis relata, servisu ne'e iha mós transporte ba vítima sira ne'ebe hetan asidente ka hetan moras derrepente, hodi lori lalais ba instituisaun ne'ebe presta kuidadu saúde apropriadu.

Nune'e, servisu nasionál ambulánsia no emerjénsia médika sei kria bainhira hamriik ona nu'udar ema koletiva públika, liuhusi instituisaun públiku, ne'ebé ho autonomia administrativa, finanseira no patrimoniál.

Governante ne'e hakotu, instituisaun públika ne'e sei tutela suprientensia membru governu atu responsavel ba área saúde hodi bele atende lalais liu ba nesesidade koletiva populasaun sira-nian. (*)