Hafoin rezultadu enkontru entre lider nasionál foin lalais ne'e, rezulta opsaun tolu inklui partidu polítiku sira movimenta forma governu foun.
Nune'e, CNRT mak lidera ona koligasaun foun ho kadeira 34. Maski nune'e, antes ne'e CNRT mós lidera koligasaun Aliansa Mudansa ba Progesu (AMP) ho kadeira 36, maibé ikus mai naksobu tanba laiha intendimentu entre partidu sira iha koligasaun.
Maibé, Lere rasik la preokupa partidu sé mak ukun, importante governu tenke metin hodi rezolve povu nia-moris.
"Ha'u rona katak CNRT forma ona atu lidera IX Governu. Ba ha'u sé de'it mak forma governu laiha problema. Ba ha'u mak governu tenke estável metin ate 2023 para ita evita eleisaun antesipada," dehan Lere Anan Timur, iha Palásiu Prezidensiál, Bairru-Pité, Kuarta (4/3).
Nia esplika, ho impase polítika ne'ebé akontese, institusaun FALINTIL-FDTL hasoru problema hanesan lojístika no viatura. Karreta ne'ebé daudaun ne'e utiliza bainhira iha tinan 2023 Malázia mak ajuda ne'ebé perigozu atu utiliza tula forsa sira tanba tinan ne'ebé naruk ona mezmu halo manutensaun.
"Ami iha problema barak tanba ami moris de'it ho duadesimu. Timor moris de'it ho duadedimu ke labele rezolve nesesidade institusionál sira-nian, Governu estável para rezolve povu nia-nesesidade," afirma Lere.
Entertantu, Lere rasik hatete, FALINTIL-FDTL nafatin esforsu atu buka meui atu rezolve problema ne'ebé institusaun forsa hasoru no nafatin garante estabilidade no seguransa nasionál relasiona ho situasaun polítika ne'ebé akontese. (*)