Maski nune'e, sobrevivente no eis-Comandante em Chefe das FAILINTIL, Kay Rala Xanana Gusmão rasik la hola parte iha serimónia importante ne'e.
Primeru Ministru (PM), Taur Matan Ruak hatete, loloos lider istóriku Kay Rala Xanana Gusmão mak fó lia-menon ba maluk veteranu sira iha loron nasionál veteranu nian.
"Maibé nia (Xanana) laiha, ha'u lori nia-naran hotu fó saudasões ba veteranu frente armada, frente klandestina no frente diplomátika sira hotu", dehan Taur, iha diskursu selebrasaun loron Veteranu, iha Sentru Konvensaun Dili (CCD), Tersa (3/3).
Nia hatutan, dezde funu to'o ohin loron sakrifika intrese privadu hodi tane nafatin intrese nasionál. Esperiensia ne'e mak tenke kaer nafatin hodi kontinua ba oin.
Taur akresenta, uluk luta ho objetivu ida atu ukun-aan no agora ho objetivu bem estar no seguransa ba nasaun Timor-Leste no povu tomak.
Nune'e, agora veteranu hotu-hotu presiza implementa projetu ida ne'ebe atu investe osan ba oan, família, grupu no liuliu ba nasaun nia-futuru. (*)