Deputadu husi bankada KHUNTO Luis Roberto hatete, diskusaun entre partidu sira iha koligasaun foun ne'e lao hela, maibé seidauk iha serreza atu aprezenta ba Prezidente Repúblika Francisco Guterres Lu Olo.

"Atu forma estrutura ba koligasaun foun ne'e ami deputadu la ko'alia to'o iha ne'eba, maibé ami entrega ba ami-nia lider nivel altu sira iha partidu, ha'u fiar katak ami-nia lider nivel partidu KHUNTO sei halo hela liña konsultasaun entre partidu hirak ne'ebé asina akordu," dehan Roberto iha parlamentu nasional, Kinta (27/02).

Deputadu ne'e hatutan, to'o agora seidauk iha desizaun koletivu kona-ba lista membru governu.

"Tanba saida mak seidauk iha desizaun koletivu ne'e ami entrega ba ami-nia lider partidu sira mak hatene muito bem," dehan nia.

Iha parte seluk, deputadu UDT Francisco David Carlo hatete, iha koligasaun dadaun ko'alia hela, maibé seidauk iha serteza.

"Husi bankada UDT/FM formalmente seidauk mais hanesan membru deputadu hotu-hotu ko'alia ba malu ona, maibé formalmente seidauk, " dehan Francisco.

Kona-ba formasaun governu foun, deputadu ne'e dehan, sira koalia ona informalmente oinsa atu forma governu, maibé seidauk iha diskusaun formal ida.

"Ami ko'alia ba malu hanesan informalmente oinsa atu forma governu, maibé seidauk (iha diskusaun formal), talvez iha ida-idak nia laran hanoin to'o iha ne'eba, depois iha tempu kurtu nia laran, ami bolu malu tuur hamutuk, se karik bele," katak nia.

Kona-ba data atu tuur hamutuk, Francisco dehan seidauk iha data fiksu.

"Hein de'it, kuandu buat ne'e mosu ona entaun bele hatene katak governu foun iha ona, maibé dadaun formalmente seidauk iha," dehan nia.

Antes ne'e Prezidente CNRT Kay Rala Xanana Gusmão liu husi intervista iha televizaun GMN hatete, CNRT sei la buka Partidu seluk atu forma governu no sei la hola parte iha governu foun.

"VIII Governu laiha duni kapasidade ukun tanba provoka daudaun ona, haree provoka ekonomia tuun demais, setor privadu barak mak la selu tan traballadores, hakarak faan tiha kareta mas ema la sosa, ha'u sosa tiha karreta ne’e atu ba para iha ne'ebé tanba mina laiha, ne’ebe ita haree buat sira ne’e hotu."

"Ha’u mós haree, ha’u mak halo konkluzaun informal ida katak VIII Governu laiha duni kapasidade. Iha akta reuniaun ne’e, tanba maioria inesperiente hotu. Ha’u tenke rekoñese katak, Primeiru Ministru entrega tomak ona ba Prezidente Repúblka atu buka ka fó solusaun, tanba Prezidente Repúblika nia jura atu defende Konstituisaun no ezije ba sidadaun sira hotu atu tuir konstituisaun, ne’e iha nia juramentu. Menus CNRT, hanesan ohin temi beibeik ona, CNRT tama ho Governu ida ne’e, ho ida ne’eba, nia ema sei la tama pose, ita ba halimar fali forma Governu ka lae! Menus CNRT, Partid seluk-seluk mak tenke buka malu, ko’alia ba malu, la’ós ha’u mak atu ba dialogu."

"Ha’u dehan tiha ona CNRT iha serteza absoluta ho see-see de’it nia ema sei la toma pose. Ah buka seluk lae, ne’e ami-nia kompetensia, tanba ne’e atu responde ita-boot (entrevistador) ba CNRT, ba de’it ami, lae, se ha’u dehan ba imi hotu ne’e dehan poder informal ne’e. tanba ne’e ba ami CNRT Eleisoins antesipada mak dalan loos, justa no demokratika, tanba ita Repúblika Demokrtaika de Timor-Leste,” dehan Xanana hodi hatan ba lian husu karik CNRT sei halo koligasaun ho partidu seluk iha formasaun governu foun mai ne’e.