Relasiona ho koligasaun foun ne'ebé forma ona husi CNRT inklui partidu lima seluk hanesan PD, KHUNTO, FDD, Frente-Mudansa no UDT tenke hanoin didi'ak membru sira ne'ebé atu aprezenta hodi simu pose, liuliu membru na'in hitu (7) husi CNRT no rua (2) husi KHUNTO, ne'ebé antes ne'e pondera ona.
"Atu aprezenta fali lista ema na'in (sia) 9 nian, CNRT ka partidu sira ne'e hanoin halo didi'ak. Ha'u repete tan hanoin halo didi'ak mak aprezenta fali," dehan Prezidente Repúblika, Francisco Guterres Lú Olo, iha Salaun Ministériu Finansas Ai-tarak Laran, Segunda (24/2).
Lú Olo hatete, povu hatene ona katak Prezidente Repúblika iha VIII Governu la fó pose ba membru pendente hamutuk na'in 9 husi CNRT no Khunto.
"Ikus mai, tanba de'it ema na'in 9, (maka) vota kontra orsamentu ida ba povu tomak. Tanba de'it ema na'in sia," hatete Lú Olo.
Entertantu Partidu CNRT hamutuk ho partidu lima seluk hanesan, PD, KHUNTO, FDD, FM/UDT hamutuk 34 kadeira asina ona ata koligasaun ne'ebé realiza iha Sede CNRT, Bairru dos Grillos, Sábadu (22/2). (*)