"Até agora ha'u seidauk simu karta ruma, koligasaun foun ne'ebé dehan forma ona entre partidu polítiku sira hamutuk ho CNRT," dehan Xefe Estadu, Francisco Guterres Lú Olo, iha Salaun Ministériu Finansas, Ai-tarak Laran, Segunda (24/2).
Prezidente Repúblika rona de'it informasaun, maibé ofisialmente husi partidu sira ne'ebé forma koligasaun ne'e, seidauk tenik buat ruma ba Xefe Estadu.
Prezidente Repúblika husu ona atu partidu polítiku sira buka malu hodi rezolve impase polítika hafoin Orsamentu Jerál Estadu (OJE) tinan fiskál 2020 xumba iha Parlamentu Nasionál.
"Ha'u hatete ona partidu polítiku sira buka malu, la esklui nem partidu ida," dehan Lú Olo.
"Hotu-hotu ba buka malu ho ulun malirin mak ko'alia para aprezenta fali ba Prezidente Repúblika, (maibé) até agora ha'u seidauk simu," tenik nia.
Entertantu, Partidu CNRT hamutuk ho partidu lima seluk hanesan, PD, KHUNTO, FDD, FM/UDT hamutuk 34 kadeira asina ona akta koligasaun ne'ebé realiza iha Sede CNRT, Bairru Grillos, Sábadu (22/2). (*)