"Ha'u hakarak husu dala ida tan ba Deputadu sira atu aprova lalais Lei Anti Korrupsaun," dehan Xefe Estadu, Francisco Guterres Lú Olo, iha Salaun Ministériu Finansas, Ai-tarak Laran, Segunda (24/2).

Nia hatutan, Projetu Lei Anti-Korupsaun tama ona ba meza parlamentu nasionál, dezde 9 Jullu 2018.

Liuhusi projetu ne'e deputadu sira propoin atu establese medida prevensaun no oinsá kombate korrupsaun.

Lú Olo hatutan, Projetu LAK tama ona dala tolu no Prezidente Repúblika nafatin espera atu Parlamentu Nasionál aprova iha tempu badak.

Antes ne'e, PN falla diskusaun ba LAK ne'ebe agora budu hela iha gaveta laran.

Deputadu Bankada Partidu Demokrátiku (PD), Adriano do Nascimento hateten, LAK la'ós foin mak ida dadaun. Prosesu diskusaun dahuluk mos hanesan, nune'e Bankada PD no FRETILIN submete fali.

"Lei Anti Korrupsaun ne'e dala rua ona, ida pertama ne'e hatama tiha ona iha gaveta nonook tan de'it", dehan nia, iha Uma Fukun PN, Kinta (6/2).

Nia esplika, lei ne'e hatama dezde lejizlasaun hahú, maibé agora foin mak diskute to'o artigu 9 ka 10 husi totál artigu 20.

Deputadu Adriano hatutan, lei ne'e gastu ona osan hodi halo estudu komparativu iha Macau, fila mai iha hanoin foun balu atu aumenta tan artigu preventiva. Nune'e, fó tempu ba téknika no asesór sira elabora tan maizumenus artigu 20 hanesan ne'e.

Nune'e, ho aumenta tan inisiativa husi estudu komparativu husi Macau maka deside atu diskute iha fulan-Marsu nia-laran, maibé agora muda fali ba Abríl.

"Ha'u mós hato'o preokupasaun katak se ita muda beibeik lei ne'e, kuandu mandatu ne'e hotu la diskute ona hanesan lei uluk mandatu hotu la diskute", dehan Adriano.

Nia akresenta, kuandu lei ida la diskute iha durante mandatu, adia hela dei't, mak mandatu remata labele diskute tan ona tenke foun fali. (*)