Hafoin foti desizaun, PD sei haruka karta ba Partidu Libertasaun Popular (PLP) no Partidu CNRT ne'ebé molok ne'e haruka ona proposta ba sira.
Prezidente PD Mariano Asanami Sabino hatete, nia parte sei sumariza hanaoin hotu-hotu ne'ebé prezidente PD munisipiu sira hato'o, hafoin lider PD sei tuur hamutuk atu haruka karta ba partidu politika sira.
"Karta ne'ebé atu haruka mak sei ba partidu PLP no CNRT, tanba antes ne'e partidu rua ne'e mak hato'o proposta mai PD," dehan Asanami iha Sede PD, Kolmera, Kinta (20/02).
Asanami hatutan, opsaun no desizaun ne'ebé PD foti iha konferensia nasional mak PD prontu atu forma koligasaun ho partidu politiku ne'ebe, maibe prefere liu mak forma governasaun grande inkluzaun.
"Ami-nia hanoin mak ida ne'e, iha ne'ebe de'it bele ho see de'it, maibé ami-nia governasaun ne'ebé ami hola parte ne'e tenke nakloke, tenke nafatin inkluzaun, husi partidu ne'ebé de'it bele tuur, bele mós ema independente bele tama, tanba ida ne'e governu ida ne'ebé atu rezolve impase," dehan Prezidente PD ne'e.