Antes ne'e publiku, Lideransa Forcas Armadas ninian sempre hato'o preokupasaun atu Governu legaliza atividade arte-marsiais ninia nune'e Ministru Reforma Lejizlativu Asuntu Parlamentár (MRLAP), Fidelis Leite Magalhães hatete, rezolusaun ne'e autoriza grupu arte-marsiál sira bele prátika, maibé tenke tuir lei.

"Signifika, grupu arte-marsiál sira bele prátika mas tenke prátika tuir lei, tanba rezolusaun ida antes ne'e mak bandu labele prátika. Agora rezolusaun dehan prátika maibé tenke tuir loloos lei," dehan nia, iha Palásiu Governu, Kuarta (19/2).

Nia afirma, lei númeru 5/2017 ko'alia klaru kona-ba arma branka no prátika arte-marsiál.

Iha fatin ketak, Deputadu Bankada FRETILIN, Joaquim do Santos 'Borluli' hatete, governu hasai rezolusaun atu reativa fali arte-marsiál ne'e di'ak ba joven sira ne'ebe tendensia ba arte-marsiál.

"Buat ne'ebe uluk ita halo sala ona labele hela permanente, tenke korrije, tanba buat ne'e relasiona ho joven sira-nia direitu no devér purke ne'e protejidu pur lei", dehan Joaquim.

Deputadu ne'e relata, rezolusaun uluk no agora kontestu la hanesan. Tanba ne'e, governu tenke kontrola makaas para bele garante ba sidadaun joven sira-nia direitu ne'ebe protejidu tuir lei. (*)