"Ha'u sempre tuur hamutuk beibeik ho ofisiais sira. Ha'u apela ba sira, primeiru kona-ba sira-nia neutralidade relasiona ho situasaun polítika atuál impase polítika," dehan Majór Jeneral Lere Anan Timur, iha Palásiu Prezidensiál, Kuarta (19/2).
Eis-gerrileiru ne'e esplika, neutralidade katak tenke hala'o knaar nu'udar forsa defeza.
Alende ne'e, apela mós ba ofisiais hotu-hotu tenke iha nasionalizmu no patriotizmu, nune'e labele mosu traisaun.
"Sala seluk ita konfesa ba Maromak sei perdua, mas traisaun Maromak la perdua. Sala ida ke laiha perdaun," Lere akresenta.
Nia hatutan, importante ba ofisiais FALINTIL-FDTL maka tenke leal ba institusaun, ba Komandante, ba Estadu no Nasaun.
Entertantu, iha enkontru ne'e, Prezidente Repúblika rasik husu ba Lere atu instituisaun F-FDTL bele fasilita forsa sira hodi asegura nasaun. (*)