Prezidente Bankada PD, António da Conceição 'Kalohan' hatete, halo ona aprosimasaun ba Partidu FRETILIN ho CNRT atu ko'alia kona-ba medida ne'ebé presiza halo hodi defende objetivu Estadu.
"Asaun konkreta ami haruka ona karta ba partidu boot rua ne'e, hanesan FRETILIN ho CNRT. La'ós atu lori solusaun ba, maibe atu ba ko'alia hamutuk kona-ba entendimentu hanesan ba dezenvolvimentu ka estratejia objetivu país ne'e nian", dehan nia, iha Parlamentu Nasionál, Segunda (17/2).
Deputadu ne'e afirma, nu'udar partidu polítiku PD iha dever atu ko'alia ho FRETILIN ho CNRT no aumezmu tempu rona mós husi sira.
"Posibilidade aban, (Tersa, 18 Fevereiru 2020) hanesan ne'e ami bele hasoru ona ho CCF (Comité Central FRETILIN) hodi rona prespetiva husi CCF", dehan nia.
Deputadu António akresenta, primeiru hatuur uluk ho partidu boot rua hanesan FRETILIN ho CNRT. Hafoin ne'e, hasoru malu mos ho PLP no partidu polítiku sira seluk hodi ko'alia kona-ba dalan hakotu impase polítika ne'e.
"Solusaun ne'e la'ós konkluzaun ida para ita atu hola agora. Solusaun ne'e ita espera se iha vontade ida bele ko'alia hamutuk. Ida ne'e mak solusaun para bele ultrapasa situasaun atuál", tenik nia. (*)