Tuir Sekretáriu Estadu, Deometrio Amaral hateten, kooperasaun Mercy Corps ho SEA ne'e realiza tanba Mercy Corps hetan mós fundu husi parseiru importante seluk hanesan USAID, KOICA, no União Europeia.
"Daudauk ne'e sira iha fundu ne'ebé signifikadu tebes atu kombate plástiku iha Timor-Leste. Ami haree sira-nia programa aliña tebes ho polítika governu nian zero plástiku ida ne'ebé Sekretáriu Estadu Ambiente rasik lidera," dehan Deometrio, iha knaar fatin, Mandarin, Kinta (13/2).
Iha fatin hanesan, Director of Programs Mercy Corps, Margaret Mcloughlin hatete, problema klimátika presiza kooperasaun hamutuk entre Governu no sosiedade sivíl no ema hotu-hotu.
"Tau hamutuk ami-nia paixão ba Timor-Leste hodi suporta Sekretáriu Estadu Ambiente hodi atinje nia objetivu relasiona ho klimátika nian," dehan Margaret.
Nia hatutan, asinatura MoU ne'e hanesan parte primeiru faze no ba oin Mercy Corps sei komitmentu atu kontinua kolabora ho SEA hodi haree di'ak liután polítika SEA nian iha área zero plástiku.
Entertantu, MoU ne'e rasik realiza iha edifísiu Sekretáriu Estadu Ambiente Mandarin, Díli, ne'ebé partisipa husi Sekretáriu Estadu Ambiente, Deometrio Amaral, reprezentante Country Diretor Mercy Corps, Diretór Mercy Corps Margaret Mcloughlin, komitiva SEA nível Diretór to'o departamentu inklui parseiru Mercy Corps nian. (*)