"Iha deklarasaun ne'e akuza Prezidente CNRT temi Maun Boot Xanana nia-naran, ami lamenta tebes", dehan Prezidente Bankada CNRT, Duarte Nunes, iha plenária Parlamentu Nasionál, Tersa (11/2).
Nia hatutan, leitura Branco nian liuhusi média laiha intensaun atu kontribui ba diálogu ne'ebé daudaun ne'e inisia husi Prezidente Repúblika.
"Halo insulta ida ne'e intensaun saida? Atu taka ba ita atu buka konsensu?" dehan Nunes.
Nia dehan, Maun Xanana rasik deklara ona katak sempre hakruuk ba konstituisaun. Ne'e duni, karik Xanana la tuir diálogu ne'e karik dalaruma komunikasaun liuhusi karta.
CNRT nafatin fó fiar Prezidente Repúblika atu buka solusaun ba problema tuir dalan konstitusionál no CNRT sempre hakruuk ba desizaun.
Maibé, CNRT mós kestiona bainhira diálogu la'o, tuir loloos Partidu FRETILIN tenke kontribui la'ós atu julga fali CNRT mak sala.
Entertantu, antes ne'e, Vise-Prezidente Bankada FRETILIN, Francisco Branco hatete, auzénsia Xanana Gusmão iha dialogu entre lider sira, hanesan parte ne'ebé lakohi kontribui ba hakotu impase polítika. (*)