Maski nune'e, husu ba Prezidente Partidu Congresso Nacional Reconstrução Timor-Leste (CNRT), Kay Rala Xanana Gusmão, atu tuur metin hodi halo diálogu, la'ós halai tuun-sa'e.

"Ami prontu ba eleisaun antesipada, maibe ita tuur hamutuk mak ko'alia la'ós liuhusi fali karta no média", dehan Vise-Prezidente Bankada FRETILIN, Francisco Miranda Branco, iha Uma Fukun Parlamentu Nasionál, Segunda (10/2).

Nune'e, Bankada FRETILIN mos ketiona vontade di'ak Xanana nian hodi rezolve impase polítika iha rai laran, tanba la hatudu boa fé.

Deputadu Branco afirma, iha rai li'ur Xanana hakilar ba mundu katak diálogu mak solusaun ba problema, maibé infelizmente iha rai-laran Xanana fila kotuk ba diálogu.

Nia akresenta, partidu polítiku hotu-hotu aprezenta ona solusaun ba Prezidente Repúblika atu rezolve impase atuál, maibé la'ós hanesan Xanana nian ne'ebé liuhusi média no karta.

Antes ne'e, iha diálogu entre Partidu CNRT ho Prezidente Repúblika, Prezidente Partidu Kay Rala Xanana Gusmão la ba partisipa no envia de'it karta.

Nune'e, iha diálogu entre lider rezisténsia sira ho Prezidente Repúblika, só uniku Xanana Gusmão mak la ba. Tanba ne'e, hahú hamosu dúvida ba boa-vontade eis-Prezidente Repúblika solusiona impase polítika iha rai-laran.