Tempotimor (Dili) - Bankada Parlamentár Partidu FRETILIN kestiona makaas hahalok Prezidente Partidu Congresso Nacional Reconstrução Timor-Leste (CNRT), Kay Rala Xanana Gusmão, ne'ebé ignora diálogu ba solusiona impase polítika.
Vise-Prezidente Bankada FRETILIN, Francisco Miranda Branco hateten, hahalok Xanana nian la'ós primeira-vés. Maibé halo bebeik ona hodi halo povu iha nasaun nee sai vítima.
Nia fó ezemplu, iha 2006, fahe povu Timor ba Loro-sa'e no Loro-monu ne'ebé lori dezastre boot ba povu iha nasaun ne'e. Agora atu halo diálogu ba solusiona impase polítika, maibé lakohi atu partisipa.
"Uluk ita fahe ona Timor-Leste ba loro-monu no loro-sa'e, agora fila kotuk tan ba diálogu. Ita-nia (Xanana) hakarak loloos ne'e saida ba rai ida ne'e", tenik Branco, iha uma fukun Parlamentu Nasionál, Segunda (10/2).
Nia dehan, nu'udar lider istóriku ida tenke hatudu ezemplu di'ak ba jerasaun foun, liuliu iha situasaun krusiál sira hodi buka solusaun ba futuru nasaun nian.
"Ha'u hanoin ne'e polítika má fé, tanba ita (Xanana) hakilar ba mundu katak g7+ tenke kaer diálogu hanesan solusaun ba problema hotu-hotu, maibé iha ita-nia rain (Xanana) fila kotuk ba diálogu", dehan Branco.
Deputadu ne'e afirma, halo diskursu iha mundu hodi proklama ba rai hotu-hotu katak, diálogu mak solusaun ba konflitu ka lia naksalak iha rai laran, maibé iha rai laran fila kotuk fali ba diálogu ne'e la loos.
Nia akresenta, diálogu ne'e la'os liuhusi karta, maibé diálogu signifika oin ho oin, matan ho matan ko'alia ba malu, la'os diálogu hakerek karta ba malu.
Nune'e, husu ba jerasaun foun sira labele banati tuir atetude sira ne'ebe daudaun ne'e Xanana Gusmão halo hodi aplika iha rai-laran. (*)