"Lori Governu no Estadu Timor-Leste nia naran agradese ba Primeira Ministra Nova Zelándia ho Povu Nova Zelándia tanba bele fó apoiu na ita-nia estudante sira iha situasaun ne'ebé difisil," dehan PM Taur Matan Ruak, iha Palásiu Prezidensiál, Bairru-Pité, Kinta (6/2).
Antes ne'e, Governu halo esforsu makaas kontaktu ho nasaun balun atu ajuda evakua estudante bolseiru na'in 17 iha Wuhan-Xina, maibé ikus mai Governu Nova Zelándia maka hatudu ninia laran di'ak hodi ajuda.
Nune'e, daudaun ne'e estudante sira sei karantina iha Nova Zelándia dentru semana rua antes fila mai Timor-Leste.
Eis-Jenerál ne'e esplika, durante iha Nova Zelándia maka estudante sira ne'e la dezenvolve sintoma ruma sei evakua mai Timor, maibe karik iha sintoma ruma maka Governu Nova Zelándia sei kontinua fó asisténsia no prosesu karantina sei aumenta.
Entertantu, Governu liuhusi Konsellu Ministru, (KM) aprova ona rezolusaun medida preventiva temporaria ba sidadaun sira ne'ebé husi Repúblika Popular Xina atu tama mai Timor-Leste.
Rezolusaun ne'e atu regula aplikasaun no ezekusaun ba medida temporaria kona-ba interdisaun no restrisaun ba entrada iha territóriu nasionál ba sidadaun estranjeiru sira ne'ebé mai husi Xina, relasiona ho virus Corona ne'ebé da'et lalais tebes.
Rezolusaun ne'e sei hetan revizaun kada semana rua hodi tetu hapara ga kontinua nafatin. (*)