Ministru Prezidénsia Konsellu Ministru, Hermenegildo Agusto Pereira Cabral hatete, rezolusaun governu nian ne'e atu regula aplikasaun no ezekusaun ba medida temporaria kona-ba interdisaun no restrisaun ba entrada iha teritoriu nasionál ba sidadaun estranjeiru sira ne'ebe mai husi Xina, relasiona ho virus Corona ne'ebe da'et lalais tebes.
"Rezolusaun ida ne'e sei hetan revizaun kada semana rua hodi tetu hapara ga kontinua nafatin", dehan nia, iha Palásiu Governu, Kuarta (5/2).
Ministru Hermenegildo esplika, liuhusi rezolusaun ne'e atu aplika medida interdisaun ba sidadaun sira ne'ebe iha semana haat ikus ne'e sai husi Provínsia Hubei, Sidade Wuhan, Xina, atu tama iha territoriu nasionál.
Nune'e, antes atu autoriza sidadaun ne'ebe mai husi rai li'ur tama Timor, tenke aprezenta relatóriu médiku no fotografia fó sai husi instituisaun ospitál ne'ebe rekoñese husi internasionál.
Rezolusaun ne'e Governu Timor-Leste halo hafoin virus Corona ne'ebé sai husi Sidade Wuhan, Provinsia Hubei, Xina, fó ameasa ba mundu tomak.
Nune'e, Organizasaun Saude Mundiál (OMS) hasai alerta ba mundu tomak atu halo vizilánsia ba virus ne'ebé oho ona ema barak ih Xina.
Total ema ne'ebé mate tanba virus Corona hamutuk 492. Husi numeru ne'e mate na'in 490 iha Xina, ida iha Hong Kong no ida seluk iha Filipina.
Reportajen ikus liu hamutuk nasaun 26 konfirmadu hetan ona virus Corona. (*)