James Dunn, iha tinan barak nia laran, Timor-Leste nia amigu boot ida no defensor boot ida povu Timor-Leste nia direitu ba ukun rasik-aan.
James Dunn moris iha Bundaberg, Estadu Queensland, Austrália, iha tinan-1928. Husi tinan-1962 to’o tinan-1964, hala’o knaar diplomátiku nu’udar Konsul Austrália nian iha Timor Portuguese.
Iha tinan-1974, hola parte iha misaun ida husi Austrália ne’ebé atu buka hatene realidade iha Timor Portuguese hafoin revolusaun dus kravus iha Portugál.
Iha tinan-1975, James Dunn nomeiadu hodi lidera Australian Council for Overseas Aid (ACFOA) ka Austrália nia Konsellu ba Asisténsia Internasionál nia misaun ida mai Timor-Leste. Misaun ne’e nia objetivu ida mak atu ajuda buka dalan ba governu Portuguese fila mai Dili.
Iha tinan-1977, James Dunn publika ninia relatoriu kona-ba krime funu nian no krime hasoru umanidade ne’ebé komete husi militár Indonézia iha Timor-Leste no hetan atensaun internasionál.
Hahú husi ne’ebá, James Dunn halo kampaña naruk hodi fanu konxiénsia internasionál no hamoris apoiu internasionál ba povu Timor-Leste nia luta ba ukun rasik-aan ne’ebé lidera husi FRETILIN.
James Dunn hala’o lobby iha Nasoins Unidas, iha Kongressu Amerikanu, iha Komisaun Eropeia, iha Parlamentu Europeia, Parlamentu Reinu Unidu, Governu sira iha Suésia, Dinamarka, Noruega, Finlandia, Olanda no nasaun seluk inklui Parlamentu Austrália rasik hodi buka apoiu ba Timor-Lese nia luta.
Iha tinan-1983, James Dunn publika livru ida ho títulu, Timor: Um Povo Traído, ne’ebé dokumenta oinsa komunidade internasionál no ninia rai rasik, Austrália, halo traisaun ba povu Timor-Leste.
Sekretáriu Jerál FRETILIN, Mari Alkatiri hatete, James Dunn nia mate, lakon amigo ida iha dékada barak nia laran, luta nain koerente ida ne’ebé sempre konsistente iha defeza ba Povu Timor-Leste ba auto-determinasaun no ukun rasik-aan.
Ba James Dunn nia koerensia no konsisténsia ida ne’e duni mak iha tinan-2009 Estadu Repúblika Demokrátika Timor-Leste kondekora nia ho Medalla Ordem de Timor-Leste nu’udar jestu apresiasaun ba ninia luta hamutuk ho povu Timor-Leste.
FRETILIN hato’o kondolensia klean no solidariedade boot ba James Dunn nia-señora Wendy ho nia oan Murray no Christopher.
FRETILIN partilla sira nia Tristeza no hamutuk ho sira iha momentu difisil ne’e. FRETILIN hakarak atu James Dunn nia familia tomak hatene katak la’os sira mesak mak lakon sira nia laen no aman ida, maibé Timor-Leste no FRETILIN mós lakon belun boot ida no eroi ida. (*)