"Husu ba rai lulik sira, uma lulik, matebian sira ne'ebé mate rihun atua rua-resin pelumenus fó hanoin ba sira, fó tulun ba sira para tuur hamutuk fó solusaun ba problema impase polítika ne'ebé enfrenta," dehan Prezidente Konsellu Kombatente Libertasaun Nasionál, Vidal de Jesus 'Riak Leman' iha Palásiu Prezidensiál, Segunda (3/2).
Nia fiar lider sira bainhira hamutuk atu hakotu impase polítika tanba konsidera maun boot sira mós mesak veteranu.
Eis-gerilleiru ne'e akresenta, situasaun barak mak povu enfrenta hela hanesan ema barak mak sei halerik, terus, barak mak hein hela ahi lakan, barak mak hein estrada atu di'ak, barak mak bee moos laiha.
"Ne'e hanesan naha todan ida, servisu todan ida ba maun boot sira ne'ebé ha'u temi, sira tenke hamutuk atu rezolve problema ida ne'e," dehan Riak Leman.
Nune'e atual Prezidenti Konsellu Kombatente Libertasaun Nasionál hatete, husik hela ona hanoin no husu ba Prezidente Repúblika atu fó solusaun ba problema ne'ebé iha. Foti desizaun ho imparsiál tuir lei sira ne'ebé hakerek ona iha konstituisaun, tuir knaar Prezidente Repúblika nian.
"Prezidente Repúblika, Francisco Guterres Lú Olo, uza nia kompetensia tuir konstituisaun haruka atu fó solusaun di'ak ba impase polítika," dehan nia.
Entertantu, situasaun polítika kontinua lao bainhira OJE 2020 xumba foin lalais ne'e, iha Parlamentu Nasionál. (*)