Pozisaun Igreja Katólika, liuhusi Arke Bispu, Dom Virgílio do Carmo, husu ba polítiku na'in sira atu rekoñese diverjénsia sira no buka hakuak no kaer liman hakat ba oin tamba povu kontinua halerik.
"Na'i ulun sira maski iha diverjénsia mosu, buka hakaas aan atu tau ba kotuk. Kaer liman hamutuk no rekonese buat ne'ebé akontese ita mos brani atu hadi'a," dehan nia, Arke Bispu Dom Virgílio do Carmo, iha Palásiu Prezidensiál, iha Bairru-Pité, Sesta (31/1).
Nia hatutan, buka dalan atu rekupera buat ne'ebé la loos, nune'e kaer liman hamutuk la'o ba oin.
Dom Virgílio akresenta, tanba nu'udar ema sarani tenke iha mos forsa atu simu buat ne'ebé la loos nian, aseita buat ne'ebé liu ona no hadi'a hodi la'o ba oin.
Tuir Dom Virgílio, polítiku sira kuandu hetan kadeira tanba povu mak hatúr tiha ona, hetan tiha kadeira ukun, oinsa mak buka atu hako'ak nafatin povu.
Situasaun hanesan ne'e, Dom Virgilio dehan, povu kontinua halerik tanba nee husu lider sira kaer liman hamutuk, unidade ho asaun hanesan ne'e mak hatudu nu'udar ema sarani neebe loos.
Konferénsia Episkopál mós agradese no apresiasaun ba konfiansa husi Prezidente Repúblika, Francisco Guterres Lú Olo, hodi partisipa ba diálogu buka solusaun ba impase polítika iha Timor-Leste. (*)