Liu husi média sosiál ofisiál partidu ho naran "Media Centre CNRT" deklara katak, hafoin VII Governu Konstitusionál monu, tanba labele defende ninia programa iha Parlamentu Nasionál, Prezidente Repúblika dekreta kedas ba Eleisaun Antesipada.
Tuir CNRT, desizaun Xefe Estadu iha 2017 hodi deklara EA to’o 2020 sei sai ona presedente no jurisprudénsia ne’ebé tenke halo tuir hodi hatúr solusaun justu no demokrátiku ba impase iha nasaun ne'e.
Ne'e duni, CNRT Ezije Prezidente Repúblika nia prudénsia atu hakotu impase tanba povu Timor-Leste sofre naruk ona husi impase ne’ebe la'o kleur ona.
Hafoin OJE 2020 xumba iha Parlamentu Nasiknal Prezidente Repúblika inisia diálogu ho dirijente partidu polítiku no xefe bankada sira.
Nunee, bainhira Partidu CNRT ninia tempu, Prezidente Partidu, Kay Rala Xanana Gusmão la marka prezensa, maibe hakerek de'it karta ba Prezidente Repúblika hodi halo leitura no estuda hodi ajenda fali diskusaun iha tempu seluk.
Maski nune'e, konteudu husi karta ne'ebé Prezidente Partidu CNRT hakerek ba PR Lú Olo to'o ohin loron sei segredu.