Hafoin situasaun sai la normál, Partidu CNRT ne'ebé la kumpre funsaun hodi apoia OJE governu AMP, fila fó sala fali ba Prezidente Repúblika (PR), Francisco Guterres Lú Olo.
Liuhusi média sosiál ofisiál Partidu CNRT nian ho naran "Media Centre CNRT" deklara, huun husi impase polítika ne'e mai husi Prezidente Repúblika, ne'ebé hahú kria dezde 2017 hodi 'obriga' Sekretáriu Jerál FRETILIN, Mari Alkatiri forma governu minoria.
Ikus mai iha EA, Partidu koligasaun Aliansa Mudansa ba Progresu (AMP), kompostu husi CNRT, PLP no KHUNTO hetan kadeira 34. Ho kadeira 34 ne’e AMP forma VIII Governu ne’ebe lidera husi Taur Matan Ruak.
Maibé PR Lú Olo kontinua rejeita fó pose ba Membru Governu na’in sia (9) ho intensionalmente impede funsionamentu normál VIII Governu.
Tuir deklarasaun iha média CNRT, desizaun la-prudente husi PR Lú Olo maka prejudika funsionamentu normál Primeiru Ministru, Taur Matan Ruak nia-Governu hodi labele masimiza ezekusaun Orsamentu Jerál Estadu.
Funsionamentu la normál husi VIII Governu ne’e fó efeitu negativu ba povu nia moris, tanba ne’e maka CNRT foti inisiativa no desizaun polítika hodi entrega hikas impase ba nia-hun, PR Lú Olo atu solusiona.