Haree ba senáriu polítika ne'e, akademista Universidade Dili (UNDIL), Francisco Martins 'Mausoro' hatete, OJE 2020 la pasa iha Parlamentu Nasionál tanba CNRT preokupa liu lista kandidatu membru guvernu pendente na'in hitu husi CNRT.
"Faktu ida mak membru na'in 9 ne'e la hetan aprovasaun husi Prezidente Repúblika para partisipa iha VIII Governu," dehan nia, iha nia knaar fatin, Maskariñas, Tersa (21/1).
Kestaun seluk, liña koordenasaun entre AMP paradu hodi afeta ba komunikasaun entre membru koligasaun AMP.
Antes ne'e, Prezidente Bankada CNRT, Duarte Nunes hatete, situasaun impase la ultrapasa maka Timor-Leste sei hasoru falénsia, nune'e Partidu CNRT mak sofre liu.
"Tuir ami (CNRT) nia analiza, Partidu CNRT mak sofre liu tanba nia ema na'in hitu hamutuk ho KHUNTO nian mak la hetan pose," tenik nia.
Tuir Duarte, durante tinan rua CNRT sente la justu tanba akuza CNRT laiha prosesu judisiál, nune'e CNRT sente hetan persegisaun organizadu. (*)