Hanesan publiku hatene, iha Sesta (17/01), PN deside hodi la aprova proposta OJE 2020. Hafoin ida ne'e, atividade PN mós paradu.

Normalmente bazeia ba rejimentu parlamentu nian artigu 96, kada loron Segunda no Tersa, PN sempre halo plenária.

Maibé, hafoin votus AMP nakfera no OJE xumba, atividade plenaria mós paradu.

Maske nune'e, Vise Prezidennte PN Luís Roberto hatete, funsionamentu Parlamentu la'o nafatin hanesan baibain.

"Ohin loron plenária seidauk iha tanba seidauk tau ba ajenda, seidauk konvoka líder bankada sira," dehan Luís iha PN, Tersa (21/01).

Nia informa, iha Kinta ka Sesta semana ne'e sei realiza enkontru lider bankada hodi halo ajenda ba plenaria.

Tuir observasaun jornalist Tempotimor.com iha PN, maioria deputadu mak la mosu iha PN.