""Rezultadu votasaun 13 (Lolo'os deputadu PLP 8, Khunto 5 ho PD ida maka vota afavor), kontra 15, Abstensaun 25. Proposta ida ne'e la pasa iha jeneralidade," dehan prezidente Parlamentu Nasional Arao Noe de Jesus Amaranl.

Husi rezultadu ne'e hamosu dúvida husi deputadu balun katak, reprezentasaun partidu polítiku sira iha Uma Fukun Parlamentu Nasionál hodi serve intrese lider partidu sira la'os atu serve Estadu.

"Husi votu ida ne'e bele hatene katak, sé mak iha lealidade ba Estadu no sé mak iha lealidade ba ninia lider", dehan Deputadu Partidu Libertasaun Populár (PLP), Noe da Silva, bainhira fó deklarasaun votu, iha Uma Fukun PN, Sesta (17/1).

Deputadu ne'e rasik deside vota afavór tanba nasaun presiza iha ninia orsamentu para bele responde ba nesesidade povu nian.

Entretantu, Deputadu PLP,  Fransisco Vasconcelos hateten, vota afavór tanba intrese nasionál, no Estadu ida atu moris presiza ho osan.

Deputadu Partidu Klibur Haburas Unidade Nasionál Timor Oan (KHUNTO), Luis Roberto dehan, vota afavór tanba tau interese nasionál aas liu intrese partidu.

Deputadu Bankada KHUNTO, António Verdial dehan, vota afavór tanba orsamentu atu fo benefisu ba povu no dezenvolve nasaun ne'e.

Deputadu Bankada KHUNTO, Olinda Guteres deklara, vota afavór tanba komprimisu ne'ebe halo ba povu iha tempu kampaiña.

Deputadu PLP, Cornelio Gama "L7" deklara, vota afavór tanba liu husi OJE hodi bele rekolla no buka tuir hotu ruin eroi sira ne'ebe dadaun ne'e naklekar hela iha fatin-fatin.

Deputadu Bankada Partidu Demokrátiku (PD), Mariano Assanami Sabino deklara, vota afavór tanba hakarak lider istóriku sira buka malu atu hamutuk no unidade, tanba sira mak sai mata dalan ba jerasaun foun sira.

Deputadu FRETILIN, Antonino Bianco hatete, vota kontra tanba atu fanu lider istóriku sira para bele haree no estuda situasaun sira hodi garante ba pás no unidade.