Iha inisiu fulan Janeiru tinan ne’e, Komisaun sira iha Parlamentu Nasionál (PN) hahú audensia ho kada ministériu hodi hatene di’ak liu tan pedidu orsamentu husi kada ministériu no mós sira-nia politika no progama. Ida ne’e nu’udar prosesu normal ida molok tama ba debate OJE iha plenaria PN.
Maibé, durante audensia ne’e iha membru governu balun ne’ebé la marka prezensa tanba sei pasa ferias hela.
Tuir dadus ne’ebé Tempotimor.com rekolla, membru governu ne’ebé la marka prezensa iha audensia ho komisaun sira iha Parlamentu Nasionál mak Ministru Fidelis Leite Magalhaes ne’ebé okupa kadeira ministru tolu mak hanesan Ministru Reforma Administrativa Asuntu Parlamentar, Ministru Koordenadór Asuntus Ekonomikus (MKAE), no Ministru Turizmu, Komersiu no Industria (MTKI); Ministru Salvador Pires ne’ebé okupa kargu Ministru Obras Públika; no Ministru Manuel Carceres ne’ebé kaer pasta nu’udar Ministru Justisa.
Molok ne’e mosu ona kritika barak husi deputadu sira, inklui deputadu husi bankada ne’ebé apoiu governu. Deputadu husi Bankada Partidu Libertasaun Popular ne’ebé ministru na’in tolu ne’e reprezenta ba, hato’o mós kritika maka’as.
Lee mós: Kritika husi Deputadu PLP: Fidelis, Ministru Imoral
Iha mós kritika ne’ebé deputadu sira husi bankada opozisaun, FRETILIN, hato’o ba membru governu ne’ebé falta iha audensia ho komisaun PN.
Hafoin ida ne’e, liu husi debate jeneralidade OJE 2020, deputadu husi Bankada CNRT Patriocino Fernandes deklara lakon ona konfiansa ba jerasaun foun sira ne’ebé sai membru governu iha Governu Konstitusional daualu.
Patriocino dehan, nia razaun lakon konfiansa tanba haree katak joven sira iha governu AMP serbisu uitoan maibé ezije feriadu barak liu.
"Joven sira serbisu uitoan ezije feriadu barak Liu, sentidu responsabilidade lakon tiha," dehan Patriocino iha PN, Kinta (16/01).
Deputadu ne’e dehan, durante ne’e nia iha konfiansa no espetativa ne’ebé boot ba governu AMP tanba ho postura ne'ebé mai ho idade mesak joven de’it, nune’e iha konfiansa katak bele atinze metas ne’ebé hatur iha programa governu nian.
“Governu ne’e la’o mai oin, ohin ita deskute tan iha ne'e halo ha’u-nia konfiansa ne'e mihis fali ba membru governu sira," dehan Patriocino.
Deputadu ne’e dehan, lei fó dalan atu husu ferias maibé presiza haree mós momentu hodi labele sakrifika interese povu nian.
“Iha audensia ne'ebé importante atu responsabiliza, Ministru joven sira ne'e la prezensa”, dehan nia.