Foin-sa’e 1.831 Tuir Teste Fíziku & Eskrita Ba SWP

Foin sa'e sira husi Likuisa hein hela atu tuir tes iha salaun SAIM, Likuisa, (09/12) Foin sa'e sira husi Likuisa hein hela atu tuir tes iha salaun SAIM, Likuisa, (09/12) Foto Midia Sefope

Tempotimor (Likisa) – Sekretáriu Estadu Formasaun Profisionál no Empregu (SEFOPE), Julião da Silva, Segunda (09/12/19) halo abertura teste fíziku no eskrita ba kandidatu traballadór ne'ebé tuir programa Seasonal Worker Program (SWP), iha salaun SAIM, Munisípiu Likisa.

SEFOPE, iha biban ne’e, husu ba kandidatu traballadór sira atu nafatin kuidadu sira-nia saúde ho di’ak no labele envolve iha aktus krime ruma. “Karik imi envolve iha aktus krime, sei kansela naran maski liu ona husi prosesu teste ne’e,” Julião afirma.

Ba joven sira hotu, tuir SEFOPE tenki hakbesik an ba Sentru Formasaun hodi aprende, liuliu lingua ingles, hodi nune’e fasil atu komunika ho empregadór sira iha Austrália. 

Entretantu, Diretór Jerál Empregu Paul Alves hateten kriteria ne’ebé uza hodi fó teste ba kandidatu traballadór sira husi empregadór Austrália, SEFOPE liuhusi DNEE hein implementa tuir.

Kandidatu traballadór sira ne’ebé tuir teste iha Munisípiu Likisa hamutuk 1.831. Kandiadtu sira ne'e liu tiha ona prosesu selesaun dokumentus.

Durante prosesu teste ne'e, Ekipa husi Diresaun Nasionál Empregu Exteriór (DNEE) servisu hamutuk ho ekipa SEFOPE Munisípiu Likisa hetan seguransa maximu husi Polísia Nasionál Timor-Leste (PNTL).

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.