Sekretáriu Estadu Formasaun Profisionál no Empregu (SEFOPE), Julião da Silva ne'ebé hala'o monitorizasaun ba prosesu teste ne'e dehan, prosesu teste ne’e ajénsia MADEC husi Austrália mak fó direta.
“Tan ne’e, kandidatu ne’ebé atu pasa bazeia ba ajénsia sira. SEFOPE liuhusi Diresaun Nasionál Empregu Exterior (DNEE), fasilita de’it,” informa Julião.
Ba prosesu teste ne’e, SEFOPE mós manda ona karta ba Komisaun D, Parlamentu Nasionál hodi bele observa direta. “Tanba, preokupasaun sidadaun sira nian ne'ebé deskonfia mosu iregularidade,” Julião esplika.
Nia dehan, VIII Governu ninia komprimisiu atu fó oportunidade ba timoroan 60.000 kada tinan. Husi 60.000 ne’e, SEFOPE sei kontribui %10.
“SEFOPE kontinua nafatin hala’o programa empregu rai-laran, hodi fó apoiu ba grupu auto-empregu sira hala’o aktividade, no empregu exterior mak buka oportunidade ba joven sira servisu iha rai-liur,” SEFOPE esplika.
Kandidatu traballadór sira ne’ebé tuir teste iha Sentru Formasaun Tibar, hamutuk 700. Kompostu husi kanditadu sira ne’ebé tuir ona teste iha tinan 2013, 2016, 2017 no 2018 husi munisípiu 13.