Tempotimor (Dili) – Deputada Bankada KHUNTO iha Parlamentu Nasionál, Olinda Guterres hato'o  ninia kritika ba deputadu husi Bankada FRETILIN, ne'ebé hili posisaun pasivu iha votasaun ba proposta urjénsia governu nian kona-ba OJE 2020, Segunda (23/12/19) iha sesaun plenária.

"Ha'u hanoin kolega sira ne'ebé mak tuur muron hela ne'e, tempu ikus mai lalika vota sira. Ba kampaiña lalika vota tun sa'e. Lalika vota sira. Mai vota ba KHUNTO de'it ona. Mai tuur iha ne'e para simu osan futun boboot, depois lakohi ko'alia povu nia direitu," tenik Olinda.

Iha fatin hanesan, deputadu Luis Roberto mós fó hanoin katak bainhira deputadu sira iha plenária laran, tenke vota.

"Bainhira deputadu iha plenária laran, tenke vota. Maibé, deputadu balun tuur iha ne'e mais la vota. Ne'e, tanba saida? Ida ne'e mak dehan em nome povu nian? Ne'e polítika fo'er. Rejimentu hakerek momoos katak o atu vota kontra ka a favór ka abstensaun tenke vota. Maibé, balun tuur hela iha ne'e mós la vota.  Ne'e tanba saida? Ne'ebé ita keta lohi povu," afirma Luis.

Hatán ba deputadu husi bankada KHUNTO, deputadu bankada FRETILIN, José Pacheco dehan, nia la fó votu ba proposta urjénsia governu nian ne'e, tanba sei OJE 2020 ne'e nesesita ba povu nia moris duni, nusa mak retira tiha fali.

"Sei orsamentu ne'e nesesita duni ba povu nia moris, nusa mak retira tiha fali? Nusa mak bankada governu la defende orsamentu ne'e. Retira tiha, depois haruka mai fali. Urjente fali. Sei orsamentu ne'e importante ba povu, nusa la rezolve uza ida ne'e. Maibé, mai mak retira-retira de'it. Ne'ebé, ha'u la vota, tanba razaun ida ne'e. La'ós tanba ha'u laiha interese ba povu. Ne'e la'e," dehan Pacheco.