Tempotimor (Dili) – Deputadu Parlamentu Nasionál (PN) husu Ministru Defeza no Seguransa (MDS) Filomeno da Paixão de Jesus atu orienta parte Polísia Nasionál Timor-Leste (PNTL) no FALINTIL Forsa Defeza Timor-Leste (F-FDTL) atu asegura seguransa ba festa Natal.

"Husu ba Ministru Defeza no Seguransa atu tau seguransa iha Bekusi para bele asegura seguransa ba povu sira iha ne'ebá, tanba ita tama ona ba Natal. Ema hakarak hakmatek, maibé hodikalan ne'e ema la hakmatek tanba joven sira halo problema to'o dader," tenik deputada CNRT, Maria Rosa da Camara "Bisoi" iha plenária PN, Segunda (23/12/19).

Nia dehan, maske PNTL no F-FDTL to'o iha fatin, maibé liu de'it minutu balun, problema kontinua filafali to'o dader.

Iha fatin hanesan, deputada FRETILIN, Gabriela Alves afirma, seguransa la'ós iha fatin ne'ebá de'it (Bekusi). Maibé, seguransa ba Timor tomak iha festa Natal ne'e.

"Seguransa la'ós iha área ne'ebá de'it. Maibé ba timor tomak. Liuliu fatin ne'ebé mak indentifika iha risku ba konflitu," dehan Gabriela.

Hatán ba preokupasaun ne'e, Ministru Reforma Lejislativa Asuntu Parlamentar (MRLAP), Fidelis Manuel Leite Magalhães promete, sei hato'o preokupasaun ne'e ba parte relevante.

"Ba distintu deputadu no deputada sira nia preokupasaun kona-ba seguransa nian, orsida ami enkamiña kedas ba Ministru Defeza, para tau atensaun," afirma Fidelis.