DILI - Prezidente-da-Repúblika Francisco Guterres Lú Olo hala’o ona vizita estadu ba Indonézia iha loron 27-29 Juñu hasoru malu ho nia homologu Prezidente Joko Widodo hodi hametin liután relasaun entre nasaun rua.

Iha vizita ne’e, Prezidente-da-Repúblika, Francisco Guterres Lú Olo sei presta omenajen ba eroi Indonézia nian iha Taman Makam Pahlawan, Kalibata Jakarta, molok hasoru malu ho nia homologu Prezidente Indonézia Joko Widodo iha Istana Kepresidenan Bogor iha loron-28 Juñu 2018. 

Hafoin hasoru malu ho nia homologu, delegasaun Timor-Leste no Indonézia sei hala’o enkontru bilaterál hodi ko’alia kona-ba asuntu sira ne’ebé hametin liután relasaun entre nasaun rua ne’e. Iha vizita estadu ne’e, nasaun rua sei asina nota ba intedimentu kona-ba evita dupla tributasaun.  

Iha loron-29 fulan-Juñu, Prezidente-da-Repúblika sei halo vizita kortejia ba Parlamentu Nasionál hodi hasoru malu ho nia Prezidente Bambang Soesatyo. 

Prezidente-da-Repúblika sei akompaña husi espoza Cidalia Lopes Nobre Mouzinho Guterres, Ministru Negosiu Estranjeiru Dionisio Babo, Xefe-de-Estadu Maior Jenerál Forsas Armadas, Majór Jenerál Lere Anan Timur, Chefe Casa Civil, Chefe Casa Militar no emprezariu Timoroan. 

Iha oportunidade ne’e, Espoza Prezidente-da-Repúblika sei vizita instituisaun ne’ebé tau matan ba planeiamentu familiar ne’ebé sei simu husi Governadór Jakarta Anies Baswesdan ho nia espoza no eskola infantil iha Jakarta ne’ebé simu husi Ministru Edukasaun Muhadjir Effendy ho nia espoza. 

Prezidente-da-Repúblika no delegasaun sei fila fali mai Timor-Leste iha loron-30 fulan Juñu tinan-2018. (pr)