"Iha dezentendimentu entre membru governu iha ministériu saúde ne'e ita bele kompriende, oinsa governu introduz médida ida interina ba fulan neen entre vise ministru ida ba vise ministra seluk, ne'e médida ne'ebé ladun apropriadu, tanba ne'e husi akontesimentu ne'e xefe governu bele halo koresaun ba hahalok ne'e," dehan deputadu CNRT Aderito Hugo da Costa iha Parlamentu Nasionál (PN), Tersa (10/12/19)
Nia afirma, vise vise na'in rua ne'ebé iha ministériu saúde ne'ebé governu deside kada fulan neen asume pasta troka malu ne'e la aproviadu.
"Agora vakun hela iha ministru ne'ebé pozisaun rotativa ne'e tenke hadi'a, tanba ladi'ak, se tau interinu, entau ida interinu, ida vise para lidera to'o hotu, mais rotativamente kada fulan neen ne'e mak mosu dezentendimentu ne'e,” Hugo hateten.
KFP Tenke Investiga Kle'an
Liga ba kazu ne'ebé agora viral iha média sosiál, deputadu Hugo husu Komisaun Funsaun Públiku (KFP) atu investiga kle'an autór ne'ebé grava no públika diskusaun entre lideransa sira husi Ministeiru Saude ne’e.
"Ema divulga informasaun ne'ebé la'os konsumu públiku ninian, tanba ne'e mak ita tenke halakon imediata atetude ida ne'e, tanba depois de diskusaun membru governu na'in rua ne'e ema públika diskusaun ne'ebé konsumu internal nian de'it," nia tenik
Deputadu ne'e akrsenta, "ami Parlamentu husu ba KFP atu haree ida ne'e, tanba KFP autoriedade reguladora ba iha funsionáriu públiku tanba ne'e sériu teb-tebes. Tanba kuakler se de'it mak asina ba funsionáriu públiku, iha klausa ida dehan siziliu informasaun katak asuntu sira ne'ebé la'os konsumu públiku labele publika sai."