Print this page

Fidelis Rai Problema Bee iha Bolsu, Deputada Olinda Kontinua Hariis Bee Galon

By December 09, 2019 4762
Plenaria PN Plenaria PN Foto arkivu Tempo Timor

Tempotimor (Dili)-Deputadau husi Bankada KHUNTO hato’o hikas preokupasaun kona-ba problema bee-moos ne’ebé komunidade sira iha Hera, inklui nia rasik hasoru. Problema falta bee-moos ne’e halo deputada ne’e tenke hariis bee galon lorloron.

Molok ne’e, deputada Olinda liu husi sesaun plenaria levanta ona problema bee-moos no nia ne’ebé hariis bee galon.

Maske nune’e, tuir deputada Olinda to’o ohin loron, Ministru Reforma Lejislativa Asuntu Parlamentar (MRLAP) Fidelis Magalhães rai de’it preokupasaun kona-ba bee-moos ne’e iha ninia bolsu.

"Iha fatin ida ne'e de'it ha'u-nia intervensaun (kona-ba bee iha Hera) dala-barak ona hato'o ba ministru Fidelis Magalhães, mais to'o agora de'it seidauk (iha solusaun), ha'u sei hariis ho bee galon, ne'e tanba saida?, inkapasidade ne'e husi ne'ebé? Asesór barak mak monta iha sorin-sorin mak inkapasidade, tuun par ema seluk sa'e fali, se laiha kapasidade, labele mantein, tanba kestaun ne'e dala lima ka neen ona mak ha’u levanta iha ne'e," dehan Olinda iha plenária PN, Segunda (09/12/19)

Nia informa, durante ne’e komunidade sira hahú husi Akanunu to’o Hera, Postu Administrativu Metinaru, Munisipiu Dili, enfrenta problema bee.

Deputada ne’e dehan, mota bomba ne’ebé instala husi tempu Indonezia aat hotu ona. Tan ne’e, nia levante problema ne’e atu governu AMP bele tau konsiderasaun hodi rezolve.

"Husu ba governu atu hadi'a, tanba ami ne'ebá kobra malu hadi'a mós seidauk iha solusaun. Ami-nia intervensaun ne'e ministru Fidelis hato'o ba governu ka la'e? Keta ministru MRLAP tau tiha ba bolsu depois ba toba tiha, ba tau tiha sumasu ka hakuak metin tiha, ne'ebá ami presiza bee, la'os ha'u mesak, maibé ema hamutuk rihun 838 ne'e presiza bee," dehan Olinda.

Hatan ba preokupasaun ne'e Sekretáriu Estadu Komunikasaun Sosiál (SEKOMS) Merício Juvinal dos Reis Akara dehan, tekniku sira daudauk ne’e hala’o hela serbisu hodi haree problema refere.

"Agora tékniku sira halo hela serbisu, espera señora deputada kontinua halo fiskalizasaun par bee-moos iha Akanunu bele realiza," dehan Akara

Rate this item
(2 votes)
Last modified on Tuesday, 10 December 2019 01:38
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items