PD: Governu AMP Hakmumuk de’it Kampu Serbisu Rihun 60

Deputado husi Bankada PD, Adriano do Nasimento Deputado husi Bankada PD, Adriano do Nasimento Foto File

Tempotimor (Dili)-Pesimista ba programa governu Aliansa Mudansa ba Progresu (AMP) hodi kria kampu serbisu 60.000 da’et ba fatin-fatin. Opozisaun konsidera programa ne’e hela de’it iha AMP sira-nia ibun-tutun hodi hakmumuk kada tinan.

Deputadu husi bankada Partidu Demokratiku Adriano do Nascimento promesa kampu serbisu ne’e governu AMP lidera husi Primeiru Ministru Taur Matan Ruak sempre temi kada tinan, maibé to’o ohin la realiza.

Tuir deputadu ne’e, kampu serbisu ne’ebé AMP promete to’o ohin la mosu no ida ne’ebé mosu mak númeru dezempregu ne’ebé aumenta kada tinan.

"Aliansa Mudansa ba Progresu (AMP) jere ona Orsamentu Jerál Estadu (OJE) ba dala tolu, no númeru dezempgu mós aumenta ba beibeik, ba sa polítika VIII governu nian atu kria kampu serbisu rihun 60 kada tinan hela de'it iha ibun-tutun hodi hakmumuk," dehan Deputadu Adriano iha PN, iha debate OJE 2020 ba loron rua, Tersa (03/12/19).

Problema dezempregu, tuir deputadu ne’e sai aat liu tan tanba Ministeriu Edukasaun Juventude no Desportu (MEJD) hasai tan ema na'in 270 resin.

"Aat liu tán mak MEJD hasai tan Timor-oan 270 resin ne'ebé hetan ona serbisu iha governu anteriór sai fali dezempregu iha nasaun ida ne'e," dehan Adriano.

Iha fatin hanesan, deputadu bankada Fretilin Aniceto Longuinhos Guterres husu PM Taur atu aprezenta dadus ba Parlamentu Nasionál no públiku kona-ba kria kampu serbisu 60.000

"Iha programa VIII governu nian, governu promete kampu serbisu 60.000 kada tinan, atinje ona pursentu hira?, tanba governu ne'e implementa ona OJE dala rua tuituir malu, hanesan OJE 2018 no 2019, no iha OJE 2020 ne'e atu kria tan empregu hira no empregu sira ne'e mai husi programa ne'ebé? Husi projetu tasi mane ka husi transferénsia públika ne'ebé boot tebes ne'e?," deputadu ne’e husu.

Molok ne’e, Governu Aliansa Mudansa ba Progresu (AMP) ne’ebé lidera husi Primeiru Ministru Taur Matan Ruak halo hikas promesa atu loke kampu serbisu 60.00 ba joven sira.

Lee mós: “Promesa Falsu” AMP: Promete tan Kampu Serbisu 60.000 iha Tempu Badak

Promesa ida ne’e, sai ona nu’udar promesa “baibain” ne’ebé AMP seidauk bele realiza. Iha Orsamentu Jeral Estadu ba 2019, AMP mós promete sei loke kampu serbisu hamutuk 60.000 ba Timor-oan sira, maibé to’o tinan 2019 nia rohan, promesa ne’e la sai realidade.

Iha debate Orsamentu Jeral Estadu (OJE) 2020, dala ida tan AMP hasai promesa ida atu kria kampu serbisu 60.000 ba Timor-oan sira. Promesa ne’e akompaña ho lia-fuan “tempu besik” katak la kleur tan kampu serbisu 60.000 sei iha ba Timor-oan sira.

Promesa ba kampu serbisu ne’e hato’o direitamente husi Primeiru Ministru Taur Matan Ruak bainhira aprezenta proposta OJE 2020 iha Parlamentu Nasionál.

"Governu sei harii sentru formasaun exelénsia iha Hera, ida ne'e sei apoiu ba kapitál dezenvolvimentu umanu no husi ida ne'e sei ajuda no kontribui hodi atinje metas ambisioza governu nian ne'ebé atu kria kampu serbisu 60.000 iha prazu badak nia laran," deklara PM Taur iha plenaria PN, Segunda (02/12/19).

Maske konsiente katak defisil atu atinze metas ambisiozu ida ne’e, maibé PM Taur dehan, governu ne’ebé nia lidera firme hodi realiza promesa refere.

PM Taur hatete, governu sei atinze metas ambisiozu ida ne’e tanba hetan apoiu husi PN.

“Ho espíritu lealdade no respeita tomak ba responsabilidade konstituisionál ida-idak nian, ita bele alkansa metas ne'ebé preve iha programa governu nian iha lejislasaun ida ne'e nia rohan,” katak Xefe Governu ne’e.

Rate this item
(0 votes)
Last modified on Tuesday, 03 December 2019 16:55
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com