Diretora Jeral EDTL, Arlinda M.R.F.F Miranda informa, iha fulan haat nia laran ekipa EDTL konsege identifika komunidade sira ne’ebé uza ahi ilegalmente.
Hafoin identifika, Diretora ne’e dehan, ekipa EDTL fó sansaun multa ba konsumidór illegal ne’e.
“Sira ne'ebé mak seidauk selu sei hetan sansaun tuir lei atu regula hahalok sira hanesan ne'e," informa Arlinda ba jornalista sira iha edifisiu Diresaun Nasional EDTL, Kaikoli, Dili, Kuarta (27/11/19).
Kona-ba selu multa, Arlinda dehan, depende ba durasaun tempu uza ahi illegal no sei aumenta tan ho osan montante rihun $5 tanba dada ahi illegal.
Tan ne’e, nia husu ba komunidade sira atu kumpri lei hodi labele dada ahi illegal, tanba bainhira dada illegal sei aleinde hetan multa, ekipa EDTL mós sei tesi ligasaun ba uma ne’ebé dada illegal.
Iha Parte seluk, VIII Governu konstitusional falla asegura direitu konsumidores sira nian kona ba garantia ahi lakan oras rua nolu resin ha'at nia laran nune'e estraga konsumidores sira nia sasan elektronika sira.
"Ha'u nia pulsa nakonu hela maibe listrik maka mate hela de'it. Atu haris, fase roupa ou tein etu mos la tasak. Jelera a'at no televizaun no a'at tan ba kauza husi eletrisidade mate lakan," dehan Agusto da Costa Pereira, komunidade ida hela iha Komoro.