Print this page

Lista Asesor ne’ebé Kria Konfuzaun ba PN: Governu “Taka Ibun”

By November 22, 2019 3908
Taur Matan Ruak, Primeiru Ministru VIII Governu Konstitusional, Taur Matan Ruak, Primeiru Ministru VIII Governu Konstitusional, Foto File

Tempotimor (Dili) - Lista asesor ne’ebé Ministériu Finansas (MF) haruka ba Parlamentu Nasional (PN) nakonu ho konfuzaun, tanba kargu ne’ebé loloos la konsidera nu’udar asesor tama hotu iha lista refere.

Deputada Bankada CNRT Fernanda Lay hatete, lista ne’ebé MF haruka ba PN hamosu konfuzaun tanba professor no tradutór sira mós tama hotu iha lista asesor ne’e.

“Lista asesór ha'u bele fó razaun ba governu simplemente konfuzaun tanba profesór hotu tama lista asesór ne'e la loos. Ita tenke haree loloos lista asesór ne'e, ida be asesoria la'os profesór, tradutór iha ne'ebá hotu, ne'e sala,” informa deputada ne’e bainhira hetan konfirmasaun husi Tempotimor.com.

Tan ne’e, nia dehan, nia parte aseita ho kritika husi públiku, maibé klaru katak númeru asesor la atinze rihun ida resin.

Le mos: PM Taur Minismiza Kapasidade Timoroan

“(Tanba se to’o rihun ida resin) Entaun di'ak liu asesór ba troka fali funsionáriu públiku, la loos hanesan ne'e,” nia hatutan.

Deputada ne’e husu ba MF atu tenke aprezenta dadus ne’ebé loos.

“Tenke akurat ho dadus sira ne'e, ita tenke haree see mak asesór loloos duni. Profesór labele tama iha lista asesores, (tanba) funsaun la hanesan,” nia hatete.

Tuir fontes husi Tempotimor.com, governu koloka hotu professor, mediku no tradutór sira ba kategoria asesor tanba sira simu salariu ho nivel asesor nian.

Bainhira husu kona-ba  númeru loloos asesor, deputada ne’e dehan, nia parte la hatene kestaun ne’e.

“Ha'u la hatene, ba husu iha ministru sira, ministru sira mak determina, sira presiza asesór hira. Parlamentu, ami komisaun hira kedas asesór na'in sanolu de'it. Ya ba husu ba ministru, nia presiza atus ida, ba husu nia (ministru),” dehan deputada ne’e.

Entretantu, Tempotimor.com koko atu konfirma ho Ministériu Reforma Lejislativa Asuntu Parlamentar (MRLAP) kona-ba asuntu asesor, maibé Andre Lotte, Xefe Gabinete MRLAP hatan katak dadus hotu-hotu entrega ona ba PN.

“Kona-ba informasaun refere ha’u informa katak dadus hotu-hotu ne'ebé relevante kona-ba MRLAP, MCAE-MTCI interinu nia gabinete hato'o tiha ona ba Parlamentu Nasional, inklui kona-ba asesor sira hotu. Iha biban ida ne'e hau la iha informasaun seluk liga ba asuntu ida ne'e,” dehan Xefe Gabinete MRLAP via messenger.

Le Mos :Iha Governu AMP, Ministériu Ida Asesor to’o na’in 192

Iha parte seluk, tempotimor.com mós esforsu atu hetan informasaun husi Gabinete Primeiru Ministru, maibé Xefe Media gabinete PM hatan katak nia laiha koñesimentu ba asuntu ne’e.

“Ha’u la asesu ba dadus sira ne’e, tanba ha’u-nia serbisu ba loos media nian,” dehan nia.

Tempotimor.com esforsu maka’as mós atu hetan konfirmasaun husi Ministériu Finansas, maibé tentativa hirak ne’ebé jornalista tempotimor.com halo la hetan resposta pozitivu husi MF.

Rate this item
(4 votes)
Last modified on Friday, 22 November 2019 10:01
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items