Fidelis ne’ebé sai “Traidór” iha Guntur Nia Matan

MRLAP Fidelis M. L. Magalhaes, ko'alia hela MRLAP Fidelis M. L. Magalhaes, ko'alia hela Foto File, Suplai MRLAP

Tempotimor (Dili)-Deputadu husi Bankada Partidu Libertasaun Popular (PLP) iha Parlamentu Nasionál hahú “raan-sa’e” haree Ministru Reforma Lejislativa Asuntu Parlamentar (MRLAP) Fidelis Manuel Leite Magalhães tanba konsidera ministru ne’e haluha ninia serbisu no halo fila fali propaganda politika.

Deputadu PLP ne’e fó kritika refere ba Fidelis tanba daudauk ne’e la preokupa ona ho Lei Pensaun Vitalisia ne’ebé uluk iha tempu kampaña nia rasik kontra maka’as tebes.

Maibé, Guntur dehan, bainhira Fidelis sai ministru ne’ebé kaer pasta ba asuntu parlamentar, Fidelis la preokupa ona buat ne’ebé uluk nia kontra.

"Iha 2019, ha'u ezije ba Ministru MRLAP par halo peskiza, par labele implika sasan sira ne'e, maibé nia la kumpri nia promesa ne'e, halo fali buat seluk," deklara deputadu Guntur iha Parlamentu Nasionál, Tersa (19/11/2019).

To’o agora, deputadu PLP ne’e hatutan, ministru ne’ebé mai husi PLP ne’e seidauk halo lejislasaun ruma hodi troka lei pensaun vitalisia.

"Loloos ne'e serbisu MRLAP nian mak atu haree ba (pensaun vitalisia) ida ne'e, maibé nia nunka halo. Signifika katak Ministru MRLAP nunka halo buat ruma ba VIII Governu? Klaru, ba mak halo fali propoganda polítika, ba mak halo fali kampaña. Ne'e la'os tempu kampaña ka propaganda polítika," nia dehan.

Tuir nia, durante ne’e ministru Fidelis halo polítika propaganda no kampaña maka'as, maibé prátika ne'e laiha.

Guntur mós kritika kargu seluk, Ministru Koordenadór ba Asuntu Ekonomia, ne’ebé Fidelis assume.

Tuir deputadu ne’e, Fidelis mós la konsege hala’o ninia knar nu’udar ministru koordenadór ba asuntu ekonomia.

"Iida kompeténsia MRLAP de'it nia la kumpri. Agora Ministru Koordenadór Asuntu Ekonomia (MKAE) nian, ema Xina sira mak domina merkadu. Agora, lei investimentu ne'e oinsa, fó dalan ka lae?," Guntur kestiona.

Tempotimor.com koko konfirma ho gabinete MRLAP maibe to'o notisia ne'e hatun parte relevante la fo resposta ba perguntas ne'ebe koloka.

Rate this item
(5 votes)
Last modified on Tuesday, 19 November 2019 17:13
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com