Tempotimor (Likisa)-Liu husi Konferensia Daruak AMP, membru partidu sira ne’ebé envolve iha bloku ne’e simu ideia remodelasaun ne’ebé molok ne’e Primeiru Ministru Taur Matan Ruak hasai.
Notisia Relevante: PM Taur Promete Remodelasaun VIII Governu Husu Públiku Hein Ho Pasensia
Deklarasaun ne’e AMP fó sai iha rezolusaun númeru 2/2019 ne’ebé hamosu hafoin Konferensia daruak AMP ne’ebé realiza iha Tibar, Munisipiu Likisa, Sabadu (16/11).
Iha rezolusaun pontu 7 hatete; “AMP konsidera nosaun atu halo remodelasaun ba Governu Konstitusional Daualuk hodi responde ba nesesidade dezenvolvimentu pais nian, liu-liu kontribui ba hadi’a dezempeñu Governu nian”.
Rezolusaun ne’ebé asina husi reprezentante AMP na’in tolu; Francisco Kalbuadi Lay, Fidelis Magalhães no José Agustinho da Silva ne’e aplika ho karater vinkulativu.
Ba kestaun ne’e, jornalista sira koko atu husu ba Koordenadór AMP Francisco Kalbuadi Lay, maibé nia rezeita hodi hatan katak buat hotu hatete ona iha rezolusaun.
