Defende Interese Nasionál, AMP sei La Troka Kandidatu Membru Governu Pendente

Sekretariu Jeral Partidu CNRT, Francisco Kalbuadi Lay ho Sekretariu Jeral KHUNTO, Jose Agustinho da Silva hamriik besik meja Konferensia AMP (16/11) Sekretariu Jeral Partidu CNRT, Francisco Kalbuadi Lay ho Sekretariu Jeral KHUNTO, Jose Agustinho da Silva hamriik besik meja Konferensia AMP (16/11) Foto tempotimor.com

Tempotimor (Likisa)-Bloku Aliansa Mudansa ba Progresu (AMP) liu husi Konferensia daruak deside hodi mantein kandidatu membru governu na’in sia (9) ne’ebé Prezidente Repúblika Francisco Guterres Lu Olo seidauk fó pose.

Koordenadór Jeral AMP, Francisco Kalbuadi Lay deklara katak iha Konferensia daruak ne’e, membru AMP koalia asuntu hotu-hotu no tau aas interese nasionál no foti ona desizaun kona-ba situasaun kandidatu membru governu pendente.

"Kayaknya ida ne'e ha’u hatete dala-barak ona no sira hotu (AMP) mós la konkorda se troka (membru governu pendente. Ami ohin (Sabadu) koalia buat hotu-hotu, ne'ebé ami tau interese nasional aas liu, iha AMP nian iha diskusaun balun kestiona mais ami bele komprende hamutuk katak situasaun mak ida ne'e, buka meius nafatin, rai ida ne'e ema hotu-hotu nian, pertense ba ema hotu," deklara Kalbuadi iha Sentru Formasaun Tibar, Munisipiu Likisa, Sabadu (16/11).

Maske nune’e, kona-ba solusaun ba membru governu pendente, Kalbuadi dehan, intrega ona ba lider boot AMP na’in tolu; Xanana, Taur ho Naimori, atu hare'e solusaun saida mak di’ak liu ba futuru.

Entretantu, iha rezolusaun AMP númeru 2/2019 deklara katak “AMP observa katak Membru Governu ne’ebé ladauk kompletu kontinua lori prejuizu ba implementasaun programa Governu Konstitusional Daualu, inklui afeta ba planu asaun anual no Ezekusaun Orsamentu Annual. Tan ne’e, solisita ba Primeiru Ministru, Taur Matan Ruak atu halo nafatin komunikasaun ho Prezidente Republika hodi asegura tomada de posse ba Membru Governu indijitadu sira”.

Rezolusaun ne’e mós hasai pontu seluk ne’ebé husu ba PR Lu Olo atu justifika formalmente (ho eskrita) ninia pozisaun kona-ba membru governu pendente.

“Bainhira Iaiha solusaun ba membru Governu indijitadu sira, AMP sei la halo dialogu ho kualkuer entidade no personalidade politika,” AMP deside liu husi konferensia daruak ho tema “Konsolida AMP hodi Serbi Di’ak Liu Povu” ne’e.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.