Diretór konservatóriu servisu notáriadu Baukau, Marcelino Gama, hatete, programa atendementu rejistu movel ne’e prioridade husi Oitavu Governu Komstituisionál, tanba ne'e Governu preve ona orsamentu, hein atu implementa iha tempu besik.
"Ministru horseik ko'alia ona, atu fó prioridade ba rejistu movel, maibé agora la'os ona offline, agora ba Online, ita ba ne'eba hasai sertidaun nasimentu sidadaun ne'e mós hetan billete identidade", dehan nia iha kna'ar fatin, Segunda (16/01).
Tanba ne'e, iha trimestral dahuluk fó tempu ba ékipa sira atu halo ona preparasaun ba kondisoins sira, hanesan transporte, kombustivel, ekipamentus inklui finansiamentu, hafoin tun ba tereñu fó atendementu ba komunidade sira.
Programa rejistu movél ne'e sei akontese iha trimestral daruak (fulan-maio to'o jullu) no sei lansa iha Postu Administrativu hotu, hanesan Baukau Vila, Baguia, Laga, Kelikai, Venilale inklui Vemase, no tuir planu rejistu iha Postu ida durante loron 13 nia laran.
"Tanba ne'e iha primeiru trimestral, Governu prepara mak ida ne'e, atu segundu trimestral ita realiza ba Postu Administrativu sira", nia informa
Husu komunidade hotu atu partisipa iha atendementu rejistu movél ba Sertidaun Nasimentu no Billete Identidade nian iha nivél Postu. (*)
